Robert Mauer zendu berri da. Herpetologista, Jura aldeko esplorazioetan aritu zen San Marti Harrira jin aurretik. 1954an etorri zen lehen aldiz, Marcel Loubensen gorpua ateratzeko operazioan; urte horretan bertan, errekan gorako bidean pixka bat esploratu ahal izan zuten, Salle de Navarren aurrera eginik 1º Tunel del Vientoraino. Hurrengo 6 urteetan leizea itxita egon ostean (mugen auzia) 1960 itzuli zen, VI Euskal Espeleologia Jardunaldietarako hain zuzen ere. Urte horretan, errekan gorako esplorazioetan jarraitu zuen, Santestebanek eta Arkautek gidatutako taldean, esplorazio terminusa Diaclasa Hidalgan ezarri zenean. Denak, Basabürüko Lezia eta bestelako sarrerak aurkitu aurreko garai heroikoetan, euskal espeleologiari ekarpen esanguratsuak eginez.
